குறுந்தொகை - பாடல் 50

ஐயவி  அன்ன சிறுவீ  ஞாழல்

செவ்வி  மருதின் செம்மலொடு தாஅய்த்

துறைஅணிந் தன்றவ ரூரே யிறையிறந் 

திலங்குவளை ஞெகிழச் சாஅய்ப்

புலம்பணிந் தன்றவர் மணந்த தோளே " 

பாடலின் பொருள் :

ஞாழல் மரத்தின் வெண் சிறு கடுகு போன்ற சிறிய பூக்கள் மருத

மரத்தின் சிவந்து முதிர்ந்த மலர்களோடு தரையில் உதிர்ந்து

பரவிக் கிடந்து அவரது ஊரில் உள்ள நீர்த் துறையை அழகு செய்தன 

அவர் முன்பு தழுவிக் கூடிய எனது தோள்கள் முன்கையைக்

கடந்து ஒளி விளங்கும் வளையல்களை நெகிழ்ந்து விழும்படி மெலிந்து

தனிமைத் துன்பத்தையே தனது அழகாகப் பெற்றன

பாடலைப் பாடியவர் குன்றியனார்